У верасні Гродзенскі тэхнапарк пераедзе ва ўласны будынак

Пра тое, што Гродзенскі тэхнапарк у верасні пераедзе ва ўласны будынак, у час пашыранага пасяджэння абласнога навукова-тэхнічнага савета паведаміла рэктар ГрДУ імя Янкі Купалы Ірына Кітурка.

РУП «Вучэбна-навукова-вытворчы цэнтр «Тэхналаб», заснаванае ГрДУ імя Янкі Купалы, атрымала статус навукова-тэхналагічнага парку ў сярэдзіне 2017 года, але пакуль тэхнапарк існуе на арандаваных плошчах.

«На 1 верасня 2018 года запланавана адкрыццё ўласнага будынка тэхнапарку па вуліцы Гаспадарчай. Зараз там завяршаюцца будаўнічыя работы. Гэты будынак плошчай каля 1 тыс. кв.м стане толькі першым этапам развіцця навукова-тэхналагічнага парку ў Гродне», – адзначыла Ірына Кітурка. Яна падкрэсліла, што адкрыццё на базе навукова-тэхналагічнага парку новых інавацыйных вытворчасцей і прадпрыемстваў дазволіць стварыць для рэгіёну і новыя высокакваліфікаваныя працоўныя месцы. Арэнда плошчаў па зніжаных стаўках, льгатаванне падаткаабкладання, арганізацыйнае суправаджэнне рэалізацыі праектаў дасць магчымасць больш актыўна прыцягваць да працы ў тэхнапарку малы і сярэдні бізнэс. Для ўніверсітэтаў важна магчымасць камерцыялізацыі навуковых распрацовак, стварэння месцаў для праходжання практыкі студэнтамі на інавацыйных вытворчасцях.

На пасяджэнні савета была прадстаўлена канцэпцыя стварэння дзіцячага або моладзевага тэхнапарку. «Каб з’явіліся ініцыятыўныя рэзідэнты дарослага тэхнапарку, людзі, якія здольны камерцыялізаваць свае навуковыя распрацоўкі, неабходна вучыць гэтаму з самага юнага ўзросту. Патэнцыйнымі ўдзельнікамі тэхнапарку могуць стаць дзеці ўжо ва ўзросце ад 4-5 гадоў»,– адзначыла Ірына Кітурка. У якасці базы для моладзевага тэхнапарку ўніверсітэт прапанаваў будынак былой ваеннай камендатуры ў цэнтры Гродна. Тут плануецца стварыць парк навуковых забаў, арганізаваць заняткі ў секцыях па розных напрамках, праводзіць спаборніцтвы і конкурсы, майстар-класы, летнія і зімовыя навуковыя лагеры.

Моладзевы тэхнапарк прадастаўляе магчымасць арганізацыі розных відаў міждысцыплінарнай дзейнасці ў галіне навуковых даследаванняў, вынаходніцтва, рацыяналізатарства, уменні рашаць нестандартныя задачы, спрыяе фарміраванню сацыяльна-асобасных і прадпрымальніцкіх кампетэнцый. Ён таксама арыентаваны на актыўнае ўцягванне моладзі ў сферу эканомікі рэгіёну.

Рэалізацыя праекта, калі ён будзе зацверджаны, намечана на 2019-2020 гады.

Па матэрыялах БелТА

Поделиться

Читайте также: