Старшыня ВАК Рэспублікі Беларусь Генадзій Пальчык у ГрДУ імя Янкі Купалы сустрэўся з навуковай грамадскасцю Гродна
Старшыня ВАК Рэспублікі Беларусь Генадзій Пальчык у Гродзенскім дзяржаўным універсітэце імя Янкі Купалы сустрэўся з навуковай грамадскасцю Гродна. У мерапрыемстве, якое адбылося ў рамках Адзінага дня інфармавання, прынялі ўдзел адміністрацыя ўніверсітэта, выкладчыкі, супрацоўнікі і аспіранты, а таксама прадстаўнікі вышэйшых навучальных устаноў горада.
На сустрэчы абмяркоўваліся пытанні падрыхтоўкі і сістэма атэстацыі навуковых супрацоўнікаў вышэйшай кваліфікацыі і змены, якiя плануюцца ў ёй.
– Хацелася б, каб у людзей змянілася ўяўленне пра ВАК як вышэйшы орган кантролю. Сёння неабходна разуменне таго, што работа Вышэйшай атэстацыйнай камісіі Беларусі накіравана на падтрымку і развіццё навуковых школ. Задача ВАК – прааналізаваць адпаведнасць тэматыкі дысертацыйных даследаванняў перспектыўным накірункам навукі і паказаць, што працэдуры, звязаныя з абаронай дысертацый, маюць адкрыты характар, – падкрэсліў Генадзій Уладзіміравіч.
Сярод новаўвядзенняў, якiя плануюцца, – дэлегіраванне большага аб’ёма паўнамоцтваў і адказнасці за навуковую экспертызу дысертацый на ўзровень экспертных саветаў Вышэйшай атэстацыйнай камісіі і саветаў па абароне дысертацый, магчымасці адкрыцця савета на базе дзвюх навуковых арганізацый, прыцягненне вядучых замежных навукоўцаў да працэдуры атэстацыі, аптымізацыя колькасці саветаў па абароне дысертацый.
– Неабходна забяспечыць максімальную адкрытасць працэдуры публічнай абароны дысертацыі на ўсіх этапах яе разгледжання. Не выключаецца магчымасць правядзення публічнай абароны ў рэжыме анлайн з мэтай прыцягнення вядучых замежных навукоўцаў да абмеркавання работы, – падзяліўся Генадзій Уладзіміравіч.
Таксама Генадзій Пальчык прапануе вызначыць адзіныя патрабаванні да суіскальнікаў вучоных ступеняў доктара і кандыдата навук незалежна ад галіны навукі, па якой выканана дысертацыя. Тое ж самае будзе тычыцца патрабаванняў да апублікаванасці вынікаў дысертацыйнага даследавання і іх укаранення ў рэальны сектар эканомікі.
Патрабаванні да прысваення вучоных званняў прафесара і дацэнта, па меркаванню старшыні ВАК, таксама неабходна ўніфікаваць незалежна ад месца асноўнай працы суіскальнікаў – навуковай арганізацыі ці ўстановы вышэйшай адукацыі.
Ганна КУЛЬБА
