Спартыўныя традыцыі Купалаўцаў: вынікі Рэспубліканскай універсіяды-2019

ГрДУ імя Янкі Купалы – не толькі ўстанова, якая забяспечвае атрыманне вышэйшай адукацыі, але і добрая пляцоўка для падрыхтоўкі і прафесійнага росту спартсменаў. Доказам таму з’яўляюцца штогадовы ўдзел, высокія дасягненні і перамога Купалаўцаў у Рэспубліканскай універсіядзе па розных відах спорту. Па выніках спаборніцтваў–2019 універсітэт заняў першае месца.

За званне найлепшай змагалася 51 установа вышэйшай адукацыі рэспублікі. Спаборніцтвы праводзіліся па 33 відах спорту, з якіх 24 – алімпійскія, а таксама па летнім і зімовым шматбор’і.

Па выніках фінальных спаборніцтваў Рэспубліканскай універсіяды-2019 абсалютным пераможцам стаў Беларускі дзяржаўны ўніверсітэт фізічнай культуры. Гродзенскі дзяржаўны ўніверсітэт імя Янкі Купалы заняў першае месца ў першай групе ўдзельнікаў. Другім стаў Беларускі нацыянальны тэхнічны ўніверсітэт, на трэцім месцы – Беларускі дзяржаўны педагагічны ўніверсітэт імя Максіма Танка.

У 45 відах спаборніцтваў універсіяды ўсяго выступіла 430 Купалаўцаў, якія заваявалі 14 прызавых агульнакамандных месцаў і сталі пераможцамі ў першай групе ўдзельнікаў.

Як паведаміў начальнік спартыўнага клуба Кірыл Акуліч, першая група ўключае спартсменаў, якія навучаюцца ва ўстановах вышэйшай адукацыі абласных цэнтраў або ва ўстановах, дзе ёсць спецыяльнасць “Фізічная культура і спорт”
і на дзённай форме займаецца больш за 10 000 студэнтаў з улікам 10 працэнтаў студэнтаў завочнай формы навучання. Менавіта ў гэтую групу з дзевяці ўніверсітэтаў нашай краіны і ўваходзіць ГрДУ імя Янкі Купалы:

– Фактычна мы першыя сярод універсітэтаў класічнага тыпу і другія пасля спецыялізаванага ўніверсітэта фізічнай культуры. Сапраўды, гэта вельмі годны вынік.

Не было роўных студэнтам-купалаўцам у грэка-рымскай барацьбе, баскетболе сярод жанчын, вольнай барацьбе сярод мужчын, гандболе сярод мужчын, барацьбе самба сярод жанчын. Высокім узроўнем майстэрства яны пакарылі служыцеляў Феміды і заваявалі законнае першае месца.

Дзесьці вельмі пераканаўча, дзесьціў напружанай барацьбе былі пераможна пройдзены апаненты па такіх відах спорту, як баскетбол і дзюдо сярод мужчын, валейбол сярод жанчын. У выніку спаборніцтваў па гэтых відах спорту Купалаўцы падняліся на другую ступень п’едэстала.

З поспехам яны абышлі і візаві па вольнай барацьбе, дзюдо і гандболе сярод жанчын, а таксама па лёгкай атлетыцы ў памяшканні, кулявой стральбе, веславанні на байдарках і каноэ, адваяваўшы па гэтых відах спаборніцтваў трэцяе месца.

Як распавяла інструктар па фізічнай культуры ГрДУ імя Янкі Купалы Марына Ясене, у тым, што Купалаўцы апынуцца ў фіналістах у спаборніцтвах па барацьбе, не сумняваўся ніхто:

– Барацьба і гульнявыя віды спорту ў нас заўжды на вышыні. У спаборніцтвах па грэка-рымскай барацьбе ў нас наогул ніколі не было другога месца, толькі першае. Па грэка-рымскай барацьбе вельмі моцная школа і наладжана выдатная сувязь з Гродзенскім дзяржаўным вучылішчам алімпійскага рэзерву, выпускнікі якога прадаўжаюць вучобу ў Купалаўскім універсітэце.

Марына Ясене таксама адзначыла, што студэнты ГрДУ імя Янкі Купалы нечакана бездакорна паказалі сябе ў гандболе сярод мужчын і бліскуча занялі першае месца. Крыху саступілі гандбалісткі, але таксама паказалі годны вынік – трэцяе месца:

– На здзіўленне вельмі дапамаглі прабіцца ў фінал віды спорту, на якія ніхто не ставіў ніякіх надзей – тайландскі бокс, таэквандо, тэніс. У спаборніцтвах па гэтых відах спорту Купалаўцы занялі чацвёртае месца.

Варта адзначыць, што ГрДУ імя Янкі Купалы заўсёды быў не супраць пазмагацца за званне лепшага ў студэнцкіх спартыўных спаборніцтвах, бо яму сапраўды ёсць што паказаць. З 2012 года ўніверсітэт уваходзіць у тройку лідэраў спартыўных спаборніцтваў сярод універсітэтаў рэспублікі.

– Удзел у Рэспубліканскай універсіядзе – гэта добрая традыцыя не толькі з пункту гледжання далучэння моладзі да здаровага ладу жыцця, масавага спорту, гэта таксама магчымасць паказаць вынікі і зрабіць вядомым наш універсітэт, – падкрэсліў начальнік спартыўнага клуба Кірыл Акуліч.

Месцы ў першай групе размеркаваліся наступным чынам:

Беларускі дзяржаўны ўніверсітэт фізічнай культуры – абсалютны чэмпіён

1 месца – Гродзенскі дзяржаўны ўніверсітэт імя Янкі Купалы

2 месца – Беларускі нацыянальны тэхнічны ўніверсітэт

3 месца – Беларускі дзяржаўны педагагічны ўніверсітэт імя Максіма Танка

4 месца – Беларускі дзяржаўны ўніверсітэт

5 месца – Гомельскі дзяржаўны ўніверсітэт імя Ф. Скарыны

6 месца – Брэсцкі дзяржаўны ўніверсітэт імя А.С. Пушкіна

7 месца – Віцебскі дзяржаўны ўніверсітэт імя П.М. Машэрава

8 месца – Магілёўскі дзяржаўны ўніверсітэт імя А. А. Куляшова

Таццяна СУШКО.