У ГрДУ імя Янкі Купалы адсвяткавалі Дзень ведаў
Дзень ведаў урачыста адсвяткавалі ў Гродзенскім дзяржаўным універсітэце імя Янкі Купалы. У мерапрыемстве прынялі ўдзел кіраўніцтва ўніверсітэта на чале з рэктарам Ірынай Кітурка, выкладчыкі і студэнты-купалаўцы. Ганаровымі гасцямі свята сталі першы намеснік Міністра адукацыі Рэспублікі Беларусь Ірына Старавойтава і дырэктар тэлерадыёкампаніі «Гродна» Мікалай Мельячэнка.
Па традыцыі пачалося свята з унясення і ўзняцця сцяга купалаўскага ўніверсітэта лепшымі студэнтамі, магістрантамі і аспірантамі, якія сваімі высокімі дасягненнямі ў сферы навукі, адукацыі, культуры і спорту ўслаўляюць ГрДУ імя Янкі Купалы ў краіне і за яе межамі. Са словамі віншавання да ўдзельнікаў мерапрыемства звярнулася рэктар ГрДУ імя Янкі Купалы Ірына Кітурка:
– Пачатак вучэбнага года дае для нас новыя мары, новыя планы, новыя праекты, а самае галоўнае – магчымасці для іх рэалізацыі. Памятайце, што ваша будучыня – у вашых руках, таксама, як і будучыня краіны. Я хачу пажадаць вам не проста марыць. Я хачу пажадаць вам ставіць вялікія мэты перад сабой. І самаегалоўнае – імкнуцца да іх рэалізацыі.
Ірына Фёдараўна падкрэсліла важнасць кожнага чалавека ў дасягненні сумесных поспехаў універсітэта.
– За мінулы год мы з вамі дасягнулі вялікіх вяршынь. Сярод іх ёсць як асабістыя перамогі, так і нашыя агульныя дасягненні. Я кажу вялікі дзякуй усім вам. Толькі той, хто ідзе наперад, дасягае новых вяршынь. Нашы перамогі павінны даць нам новыя сілы і ўпэўненасць у тым, што мы можам усё. Я не раз паўтарала, што ўніверсітэт без людзей – гэта проста сцены. Жыццё ў яго ўдыхаюць людзі. Тое, якім будзе наступны год, залежыць ад вас з намі. У добры шлях, новых дасягненняў, поспехаў і рэалізацыі ўсіх вашых мар.
Пад час віншавання купалаўцаў з новым навучальным годам Ірына Старавойтава падкрэсліла неабходнасць бесперапыннага развіцця кожнага чалавека на працягу ўсяго жыцця.
– Вы можаце мець дачыненне да развіцця новых навуковых школ, быць даследчыкамі, аналітыкамі. Ідзіце наперад, стаўце перад сабой самыя амбіцыйныя мэты і дасягайце іх. Упэўнена, што дзякуючы ведам, уменням і навыкам, набытым тут, вы станеце сапраўднымі прафесіяналамі, кампетэнтнымі людзьмі. Памятайце, што няма сёння адукацыі на ўсё жыццё – ёсць адукацыя праз усё жыццё. Вы павінны развіваць сябе бясконца, кожны раз ставячы сабе новыя мэты і дасягаючы іх. Я жадаю вам на гэтым цярністым, але такім цікавым шляху перамог. Хай няўдачы вас толькі загартоўваюць і робяць вашу асобу больш моцнай, а таксама спрыяюць таму, што вы будзеце па-сапраўднаму паспяховымі, – адзначыла першы намеснік Міністра адукацыі Рэспублікі Беларусь.
Словы віншаванні з Днём ведаў у адрас акадэмічнай супольнасці купалаўцаў выказаў і Мікалай Мельячэнка. Ён пажадаў не губляць станоўчы эмацыянальны зарад увесь навучальны год.
У межах мерапрыемства адбылося ўрачыстае ўручэнне рэктарам і запрошанымі гасцямі пасведчанняў аб занясенні на Дошку гонару «Імі ганарыцца ўніверсітэт» лепшым студэнтам і аспірантам ГрДУ імя Янкі Купалы. Завяршылася мерапрыемства агульным фатаздымкам на Плошчы ўніверсітэцкага сцяга.
Марыя ПАНІЧАВА
