Рух студэнцкіх атрадаў праз гады: ад мінулага да сучаснага
Як у мінулым стагоддзі, так і сёння, рух студэнцкіх атрадаў застаецца актуальнай тэмай. Моладзь вабіць не толькі першы заробак, але і подых самастойнага жыцця, сяброўства, каханне… Адным словам — рамантыка.
ТРАДЫЦЫІ МІНУЛАГА
Згодна з архіўнымі звесткамі, якія захоўваюцца ў Музеі развіцця ГрДУ імя Янкі Купалы, першы студатрад купалаўцаў быў створаны ў 1963 годзе. У яго склад уваходзіла 110 юнакоў і дзяўчат, якія адправіліся за шмат кіламетраў ад дома на будаўніцтва жылых і сельскагаспадарчых аб’ектаў у пасёлак Фурманава Калінінградскай вобласці. Планавае заданне тады было перавыканана на 43%, за што атрад узнагародзілі Памятным сцягам Фурманскага РК ЛКСМ Казахскай ССР. У наступным годзе ў Гродзенскім педагагічным інстытуце сфарміравалася ўжо два атрады ў складзе 130 чалавек, якія былі накіраваны ва Уральскую вобласць Казахскай ССР. З 1968 года студатрады працавалі не толькі на Урале, але і ў Беларусі. Так, у Гродна і Гродзенскай вобласці дзейнічала шэсць атрадаў. У 1974 годзе студэнты 2 курса гісторыка-педагагічнага факультэта Гродзенскага педінстытута, якія ўваходзілі ў студатрад “Белая Русь”, пералічылі ўвесь свой заробак, а гэта 1 750 рублёў, у Фонд міру. А ў 1975 годзе ўсе запрацаваныя грошы былі пералічаны ў фонд будаўніцтва Палацу піянераў горада Гродна.
Студэнты не толькі працавалі на ўсесаюзнай будоўлі, калгасах і саўгасах, але і вялі шэфства над сельскімі школамі, удзельнічалі ў арганізацыі і працы летніх лагераў для школьнікаў, праводзілі выхаваўчую працу з “цяжкімі падлеткамі”, даглядалі помнікі загінулых у гады вайны, а таксама дапамагалі рамантаваць і афармляць сельскія клубы і бібліятэкі.
ПРАЗ ПЯЦЬДЗЯСЯТ ШЭСЦЬ ГОД…
З пары першага студатрада прайшло пяцьдзясят шэсць год, але попыт на працу сярод студэнцкай моладзі падчас летніх канікул штогод толькі ўзрастае.
Сёлета 700 студэнтам-купалаўцам удалося папрацаваць у педагагічных, будаўнічых, сэрвісных, прамысловых і экалагічных сферах на прадпрыемствах Беларусі і Расіі. Усяго ў гэтым годзе дзейнічала 40 студатрадаў.
Самыя шматлікія – педагагічныя. У студэнтаў была выдатная магчымасць атрымаць практычны вопыт работы з дзецьмі ў летніх аздараўляльных лагерах Беларусі – “Купалінка”, “Зорка Юбілейная”, “Сузор’е”, а таксама “Жамчужына Расіі” ў горадзе Анапа Расійскай Федэрацыі.
Галаўкова Вольга, студэнтка 5 курса філалагічнага факультэта, на працягу 18 дзён працавала выхавальнікам у лагеры “Дружба”. На гэты час ёй было даверана 40 дзяцей ад сямі да дзесяці гадоў. Кола яе абавязкаў – выхаванне, догляд за дзецьмі, падрыхтоўка мерапрыемстваў, адсочванне рэжыму дня:
– У лагеры ўжо працую трэці год запар. Набіраюся вопыту ў педагагічнай працы. Цудоўна, што ёсць магчымасць папрацаваць з дзецьмі розных узростаў. Калі знаходзішся з імі 24 гадзіны сем дзён на тыдзень, то хочаш не хочаш, а перажываеш разам з імі, радуешся разам з імі і вучышся знаходзіць падыход да кожнага. Адначасова пераконваешся ў правільнасці абранай спецыяльнасці.
Мікіта Гура, студэнт 3 курса, юрыдычнага факультэта, у якасці камандзіра атрада працаваў у лагеры “Жамчужына Расіі” ў горадзе Анапа. У яго функцыі ўваходзіла праца з важатымі, а таксама з дзецьмі ва ўзросце ад сямі да сямнаццаці год:
– Падчас працы з дзецьмі я адпачываю псіхалагічна. Мне падабаецца назіраць за дзецьмі. Яны заўсёды вучаць чамусьці новаму. Да таго ж вопыт узаемаадносін з людзьмі мне спатрэбіцца ў маёй далейшай прафесійнай дзейнасці.
У гэтым годзе з’явіўся і экалагічны студатрад, байцы якога працавалі на ГЛГУ “Гродзенскі лясгас”. Студэнтка 3 курса факультэта біялогіі і экалогіі Кацярына Аксёнкіна, якая была ў складзе гэтага атрада, падзялілася сваімі ўражаннямі:
– А восьмай гадзіне раніцы нас на аўтобусе адвозілі ў поле, дзе мы высаджвалі маладзенькія бярозкі, клёнікі, елачкі, дубкі. Для мяня гэта быў карысны вопыт, таму што ляснічыя нам расказвалі пра спецыфіку іх работы, пра асаблівасці дрэў. Мы мелі магчымасць хадзіць у лес і збіраць рэдкія расліны.
Не менш актыўны ўдзел купалаўцы прынялі у будатрадах на аб’ектах ААТ “Белцеплаізаляцыя”, КУП “Рэмбудаўтадор”, “Гроднапрамбуд”, Беларуская АЭС, ГрДУ імя Янкі Купалы і іншых.
Камандзірам будатрада з 8 чэрвеня па 23 жніўня быў Дзмітрый Ківель. Пад яго кіраўніцтвам атрад выконваў будаўнічыя працы на аб’екце ўніверсітэта.
– Мне трэба было замацоўваць пэўныя ўчасткі работ за канкрэтнымі студэнтамі, правяраць якасць выкананай працы, адсочваць розныя нюансы па дапрацоўцы і самому ўдзельнічаць у працы па аздабленні корпуса інтэрната. У першую чаргу я атрымаў добры вопыт кіраўніка.
У складзе сэрвісных атрадаў студэнты працавалі ў Цэнтры тэсціравання і прыёмнай камісіі ГрДУ імя Янкі Купалы, а таксама кухоннымі рабочымі і выратавальнікамі ў летнім аздараўляльным лагеры “Жамчужына Расіі” ў горадзе Анапа.
Акрамя таго, студэнты Купалаўскага ўніверсітэта ў складзе вытворчых атрадаў былі задзейнічаны на сумесным расійскабеларускім прадпрыемстве СААТ “ДЗІФА” па вырабу фільтраў ачысткі паветра, масла і паліва для легкавой, грузавой, сельскагаспадарчай і дарожнай тэхнікі.
Адпачываюць байцы студатрадаў падчас арганізаваных культурных мерапрыемстваў, спартыўных, творчых, інтэлектуальных турніраў.
Час ідзе, студэнты змяняюць адзін аднаго, а рамантыка студатрадаў застаецца ў памяці назаўсёды.
Таццяна СУШКО
